‘মা”হবিতে

ম’ মাবুরে আহজার জু দোঙ র’ সারিনেয় মুই দ’ কোম,
মন মঞ্জক্কায় ডাগি কঙ্গে ব’জান কোচপাঙ বুগত্ থোম!
মা পুর এচ্চে গোদা পিত্থীমিত্ জিংকানি বর দোলে চেম,
মরঙ বাজঙ মা তরে মুই দুগত্ কি সুগত্ বেক্কানিত্ থেম!

বেক কাম ইরি দুলোনত্ পুরি ওলি ডাগি তুই ঘুম নেযাস্,
বেরচাগা পিদিত্ আবর খেয় খেয় দুরি টানিনেয় মে চাস্!
বুক দিবে নি মন দিবে অচ্ কানঙ্গে ওয়াঙ হে পিরে পাচ্,
বুগত্ পিদিত্ করত্ তুলি ত’ মনর আওয়াচ্চান ইরি থাচ্!

ইরি ইরি জিংকানি ধুরি বেক পোছাত্তেয় দোস্ বিলেয়,
ইবে সিবে গম নি বজঙ মা মনত্ দ’ বেক থাস্ শিলেয়!
ইত্তুক আত্তুক কাম বাজে দোচ্ মা পুরত্ দ’ গম কাদেয়,
ইত্তি কুদুম লাগত্ পা’ পি গম লাগেদে কোম দ’ মাধেয়!!

কাদের জিংকানি হোরার অক্ত মা বাবর বস্ চ’ আদ্ধান,
কারে কলে সচ্চরম পেবঙ ক’ মা তরে ডাগঙ দিন মাধান!
কুজি অক্তত্ আগি মুদি বিজেকুরো গোদা ওই ম’ শদান,
কুত্তিঙ কুত্তিঙ গুরি ভাসে দিলে ও কি গত্তুঙ মা ত গুনান!

গুন থোগেলে একতাল অব’ শুন’ বেগরে কঙ,
গুর আঙ্গুচ্যে অলে ও মাগেন তরে পেদুঙ চাঙ!
গাঙ পাড় অলঙ সংসার দেলঙ ছাবাত্ তলে থাঙ,
গাদাগাত্তে কধক গচ্চোঙ মা তরে মুই জু গজাঙ!!

দিগি এলুঙ শুনি এলুঙ মা তর এধক কোচপানা,
দিজে মাক্যে পজ্জন কলে ঘুমত্ পত্তঙ দ’ বানা!
দাবা দিদি মুরগুজি পল্লে চিতপুরি দেগঙ ত কানানা,
দাবা দুন্দো ইরি পিয়োচ্ মত্তেয় অগুর অসুখ পরানা!

অগুর দুগত্ দেগা দেগি অগুর সুগত্ বিজগ চোক,
অঞ্জুর বানা সবন বেগর সুঞ্জুক থোগে জিরে পোক!
অজর বানা ধাদি পরে আহলে পরেত্তে গম পাদোক,
অপুরন্দি আগবর মাদো শিরে পাদঙ মুই দোল দেক্কোক!